Komin í skóla eina ferðina enn!

Esurveyspro.com snilldarforrit fyrir rannsóknir

2009-05-21T16:45:00.000-07:00

Á esurveyspro.com er að finna snilldarrannsóknartól til að gera rannsóknir vegna náms eða fyrir fyrirtæki, stór eða smá. Þar er bæði hægt að fá ókeypis prufuútgáfu eða borga sanngjarnt verð fyrir fulla útgáfu með alls kyns skemmtilegum möguleikum.
Útlitið og vinnuferlið í þessu kerfi er algjör snilld og geta allir klórað sig fram úr því.
Til að fá sem mest út úr spurningalistanum og kerfinu þarf að borga sanngjarnt verð en það er vel þess virði.
Ég er að nota þetta tól fyrir rannsóknina mína til meistaragráðu í mannauðsstjórnun og er ekki frá því að hún muni klárast einn daginn bara af því ég fann þetta fína tól til að vinna rannsóknina mína í.

Til að fá betri upplýsingar farið á www.esurveyspro.com/Default.aspx

Til að fá betri upplýsingar um verð farið á: http://www.esurveyspro.com/Prices.aspx

Til að sjá hvernig könnun getur litið út farið á http://www.esurveyspro.com/Survey.aspx?id=1c5094a8-dfff-4588-aabd-b6592fcccc99

---------------------------------------------

At http://www.esurveyspro.com you can find a great research tool to conduct surveys for your studies or your company, big or small. You can get a FREE trial version or you can pay a reasonable price for a full grown version with all kinds of great possibilities.
The look and workprocess in this system is a total genius and everyone can figure out how to work it.
For those who need to get as much as possible in regards to data from the research tool I recommend paying the price because it is totally worth it.
I am using this research tool to conduct my research to be able to finish my masters degree in Human Resource Management and I am certain that the fact that I found this research tool will be the reason for my finally finishing the Master thesis.

For further information go to http://www.esurveyspro.com/Default.aspx

For further information about prices go to http://www.esurveyspro.com/Prices.aspx

To see what a survey might look like go to http://www.esurveyspro.com/Survey.aspx?id=1c5094a8-dfff-4588-aabd-b6592fcccc99

Annálsígildi fyrir árið 2006

2006-12-28T09:04:00.000-08:00

Ekki daglegt blogg í gangi á þessari síðu. Nokkuð ljóst. En hver veit nema núna finni ég aukna þörf til að tjá mig í ræðu og riti.

Nýtt ár hefst brátt með ansi miklum breytingum og því vert að líta um öxl. Þetta ár hefur verið mjög viðburðaríkt. Svo ekki sé meira sagt. Ég tók skref sem ég hef aldrei hugleitt að taka og í því einu og sér fólst mikil áskorun. Við Sigurjón keyptum jú fyrirtæki í rekstri ásamt öðrum hjónum, Guðrúnu og Óla. Guðrún er samnemandi minn úr meistaranáminum í mannauðsstjórnuninni. Hvað um það, við rifum fyrirtækið upp og höfum náð fínum árangri ímyndarlega séð og rekstrarlega séð á þeim 9 mánuðum sem við höfum stýrt skútunni. Frábært samstarf okkar Guðrúnar hefur verið lygasögu líkast og best lýst sem skefti og blað, hanski og hönd o.s.frv. Við höfum lært mikið á þessum tíma og ljóst að þetta hefur verið heilt ár til viðbótar í námi okkar...þó við fáum enga gráðuna út á reynsluna. Það er ótrúlega sérstakt að blanda sér inn í líf fólks og framtíð á þann hátt sem við höfum gert í gegnum ráðningar skjólstæðinga okkar til fyrirtækja. Ég kom einn daginn með rétta slagorðið fyrir okkur..."við snertum líf!" Fyrir framan okkur eru margir aðilar á dag sem leggja lífsferil þeirra á borðið og biðja okkur að hafa eitthvað með næstu skref að gera. Ótrúlegur heiður, merkilegt vald og í alla staði einstakt.

En hvað um það! Nýtt ár hefst í næstu viku með öðrum ferli, því ég fékk boð um að halda í aðra átt. Snerta líf á annan máta (allt innan siðferðismarka!) og er því á krossgötum nú í jólafríinu. Lýk líklega kaflanum "sjálfstæður atvinnurekandi" fyrir áramót og hef annan. Alltaf gaman að taka þátt í áskorunum og reyna á sig!

Frábær dagur!

2006-10-23T09:00:00.000-07:00

Ég fylgist mjög vel með þessum vef hér. Ég veit alveg hvaða eignir eru nýjar og hverjar eru það ekki, hvaða verð var á þeim sem mér líst á og hversu mikið þær hafa lækkað o.s.frv. Til dæmis er ekki sjálfgefið að það sé rétt og satt sagt frá um "nýja" eign. Eignir sem þarf að selja eru skráðar inn hjá sumum fasteignasölum sem sí-nýjar, til að þær poppi sem helst upp í leit hjá saklausum húsnæðisleitandi aðilum. En ég veit betur! Þýðir greinilega ekkert að leika á mig í þessum málum! Ég læt ekki hafa af mér aleiguna fram í framtíðina með blekkingum:)

Hvað um það! Ég sá nýja, og þá meina ég nýja, eign auglýsta á föstudaginn. Hún kitlaði mig strax, staðsett í Vættaborgum með sjávarútsýni og sitt lítið af öðru sem mér finnst áhugavert. Parhús á 33,5 millur. 152 fm. Spennandi. Jæja, ég keyrði framhjá um kvöldið, aftur daginn eftir og nú með alla fjölskylduna. Fínt, fullt af möguleikum. Síðan ákváðum við hjónin að fara að skoða slotið í dag. Vá hvað það var frábært! Hreinasta unun að lenda í þessu. Að hafa eitthvað hús fyrir augunum í tölvunni heima, sem maður ímyndar sér að sér bara málið. Sjá fyrir sér að fara ekki alveg á hausinn við að kaupa það og gera það að sínu. Pæla í hlutunum. Vita að það væri skynsamlegasta í stöðunni að sitja á sínum seðlum núna og safna. Safna - safna - safna. Ekki eyða - eyða - eyða! Til að gera langa sögu ekki enn lengri þá var þetta alveg hræðilegt að innan. Vá, það var svo illa farið og alltof lítið og megn lykt þar inni og bara í alla staði off. Ég myndi ekki vilja það þó ég fengi það á slikk. Úff! Við vorum alsæl bæði tvö þegar við keyrðum í burtu. Frábær dagur! Við erum ekki að fara að kaupa hús. Bara að spara!

Ekki besti bloggarinn

2006-10-22T15:41:00.000-07:00

Það er ljóst. Ég hef ekki staðið mig í stykkinu. En það er jú einu sinni svo að ekki hefur fundist sérstök þörf fyrir slíkan verknað lengi, þar sem maður er nett búinn á því á kvöldin og má þakka sínu sæla að brjóta saman þvottinn og setja í enn eina vélina. Bloggið hefur því fengið að bíða.

Af okkur hjónunum er allt gott að frétta. Náttúrulega helstu fréttirnar þær að við erum orðin hjón. All skondið fyrirbæri að vera giftur. Svei mér ef mér finnst þetta ekki vera málið bara.

Alltaf eitthvað á döfinni hjá okkur. Næsta mál á dagskrá er að fara til Baltimore. Jú jú mikið rétt. Nú á að kynnast ameríska draumnum og upplifa þetta á eigin skinni. Ég er með eitt á stefnuskránni og það er að fá mér myndarlegan humar á einhverjum sjávarréttastað við höfnina. Gott hvítvín með. Ganga síðan um borgina, hönd í hönd við eiginmanninn og njóta þess að vera til. Allt annað verður plús. Fötin sem ég mun kaupa mér, fyrir börnin, dótið, búningar á krakkana (prinsessubúningar eru víst málið að mati Bríetar) og svo allar jólagjafirnar í ár. Má ég þó benda á að ég verð aðallega á sjávarréttastað með hvítvín í hönd og skál fyrir tómar skeljar. MMmmmmm.

Er alltaf að skoða fasteignavef mbl. Þó af minni áfergju en verið hefur. Við Sigurjón erum í skynsemiskasti og ætlum að reyna að þrauka í áttatíufermetrunum eitthvað áfram. Fæ þó vissulega kast reglulega en næ að bægja því frá mér. Skynsemiskast er í raun ágætist kast. Nú skal safnað!

Húsnæðismál

2006-07-30T17:19:00.000-07:00

Hin eilífa spurning þessar vikurnar er eitthvað á þessa leið: Should I stay og should I go! Hér er þá átt við það hvort fjölskyldan knáa í Berjarima skuli halda kyrru fyrir í íbúðarsmæð sinni og hlæja að greiðslubyrði húsnæðislána í hverjum mánuði eða gerast Bubbi kóngur og kaupa drauminn...hver sem hann svo er og hvar. Enn sem komið er hefur það fyrr ritaða unnið í baráttunni og skynsemin verið öllu yfirsterkari. Húsnæðismál eru skerí núna. Þorum ekki að leggja út í þessa vitleysu. Því hefur verið lagt í enn frekari hagræðingar á heimilinu og mublum komið fyrir í geymslu til að húsmóðir öðlist sálarró og nái andanum. Það er líklega betra en að fara í skuldafangelsi með mynd af tvöhundruðfermetra draumahúsi í vasanum:)

Tölvuleysi

2006-07-30T17:14:00.000-07:00

Sumarfríið kom mér fyrir sjónir (ef maður getur séð sumarfrí) sem riddari á hvítum hesti sem þeysti niður Bankastrætið og bjargaði mér. Loksins komið frí eftir veturinn og vorið, sem ekki var síður töff vegna fyrirtækisins nýja.

Við Sigurjón hlóðum nýja bílinn (þeir geta þetta þessir fyrirtækiseigendur ma'r) deginum áður og því var okkur ekki til setunnar boðið eftir að fríið hófst...norður norður norður. Dásamlegt fyrirbæri þetta sumarfrí. Hver fann eiginlega upp á þessu?

Hef nú aldrei verið amerísk í mér...

2006-06-05T04:20:00.000-07:00

American Cities That Best Fit You::

60% Austin

60% Denver

55% Atlanta

55% Honolulu

55% Seattle

Which American Cities Best Fit You?

Annasamur tími að baki

2006-05-22T08:04:00.000-07:00

Svo sannarlega. Hélt ég hefði þetta vart af. Búin að afskrifa allskyns vini og kunningja...hunsa öll boð um hitting og allt í stressi. En nú er prófum lokið og svei mér ef ég þarf nokkuð að sitja próf í HÍ á næstunni. Held ekki bara. Síðan hefur uppátæki okkar Sigurjóns varðandi fyrirtækiskaup tekið tímana tvo hjá okkur báðum og toll. Sigurjón hefur þó staðið sig hvað best, sótt börnin blessuð fyrir fjögur alla virka daga, jafnvel farið í vinnu eftir að ég dragnast heim eða setið og forritað nýja heimasíðu fyrir vinnuna fram á nótt. En nú er búið að kynna okkur ný-eigendur til sögunnar og kokteilboð afstaðið...og því ekkert annað eftir en mæta til vinnu eins og fín dama í dragt og pakka niður í kassa á kvöldin. Fjölskyldan flytur í Garðsstaði. Þrátt fyrir annir framundan þá eru þær ekki neitt miðað við það sem á undan er gengið og því tóm sæla að vera til!

Prófum lokið í HÍ

2006-05-13T15:44:00.000-07:00

Í tilefni prófloka í námi mínu við HÍ þetta sinnið sendi pabbi ásamt Gunni mér þessa vísu:

Til hamingju

Höldum Elsu hátt á loft
henni finnst nú gaman.
Þetta gerist ansi oft
að hún lýkur háskólaprófi!!!

Hjartans hamingjuóskir duglega dóttla.

Pabbi sinn og Gunnur

Brjálað að gera!

2006-03-28T12:14:00.000-08:00

Finnst ég vera 70%. Kemst ekki vel frá neinu í bili, en sé fram á bjartari daga. Skólinn alveg að verða búinn. Ekki þó verkefnin. Á ennþá eftir fjögur talsins. Er þó komin langleiðina með tvö þeirra, vonandi hálfnuð með það þriðja, en ekki einu sinni byrjuð á því fjórða. Ætlaði mér stóra hluti í byrjun annar. Að skila ÖLLU af mér fyrir páskafrí. Á ekki von á að það náist. En stefni þó ótrauð að því.

Eitthvað skekkti það þó alla þessa mynd að kaupa fyrirtæki. Hmmmm. Ótrúleg tímasuga. Hefði átt að kaupa í lok ágústmánaðar þegar lokaverkefnið væri í höfn. En það náttúrlega virkar ekki þannig. Í þessum bransa er að hrökkva eða bara stökkva. Ég stökk. Keypti bara góssið. Síðan þá hef ég keypt slatta til viðbótar. Keypti t.d. ísskáp í dag. Inn í skrifstofuna. Fyrir helgi voru það skrifborðsstólar og hillur, auk fundarborðs og stóla og tveggja skrifborða. Á morgun skal haldið í myndatöku fyrir heimasíðuna og nafnspjöld. Förðun á undan, hvað þá meira! Allt eftir kúnstarinnar reglum. Rétt skal vera rétt. Mágurinn góði að verða búinn með lógóið. Nýtt lúkk skal það vera á annars gamalt fyrirtæki. Ferskur svipur á fornan "fjanda!"

Sunnudagur

2006-03-19T12:14:00.000-08:00

Hvernig stendur á því að mér finnst sunnudagar ekki eins ljúfir frídagar og laugardagar? Auðvitað er um jafnlanga daga að ræða. Mánudagar ná hreinlega að smita þá. Synd og skömm!

Áttum annars ljúfa helgi. Hefði átt að læra, en gerði það ekki. Vikan sem leið reyndist mér ansi þung í skólanum þannig að ég hreinlega lét allt slíkt í friði. Gott mál. Ætla ekki að hafa samviskubit yfir því.

Það sem stendur upp úr hjá okkur hjónaleysum er föstudagurinn. Við keyptum fyrirtæki. Venjulega ekki í slíkum gjörningi. Tekin mynd af okkur í handsali við fyrrum eiganda. Leið eins og Halldóri Ásgríms. Vonandi þá á góðum degi:) Á laugardag sótti Sigurjón síðan fyrirtækið, setti það í skottið og keyrði með það á nýjan stað. Bankastræti 5. Flottur staður fyrir fyrirtæki! En ansi fyndið að koma lífsviðurværi fyrir í einu skotti.

Jafnframt má þá með sanni segja að ég er komin með vinnu. Hjá sjálfri mér! Ætli einhver annar hefði ráðið mig?

Tróðum okkur síðan í brunch á laugardegi til Kittu. Á sunnudegi til Signýjar og Sigurgeirs. Gaman að stunda vinahitting um helgar, enda lítill tími til slíks á virkum dögum. Sér í lagi eftir að ég hóf hopp í World class.

En framundan er mánudagur. Þó ekki til mæðu. Nei, heldur til vinnu!

Nei hættu nú alveg...

2006-02-26T05:49:00.000-08:00

...hvaða hvaða!

What Classic Movie Are You?
personality tests by similarminds.com

Enn eitt prófið á netinu

2006-02-26T05:30:00.000-08:00

Veit ekki hversu góð samlíking þetta er. Herre Gud!

What Famous Leader Are You?
personality tests by similarminds.com

Átaksupphaf 6. mars

2006-02-25T06:49:00.000-08:00

Nú er komið að skuldadögum. Læsti sjálfa mig og tæpar nítjánþúsundirkróna inni á reikningi WorldClass nú rétt í þessu. Minnkun framundan!

Stórskemmtilegt próf á netinu

2006-02-25T06:29:00.000-08:00

Hermi hér með eftir Sigurjóni Gladiator...

You scored as Captain Jack Sparrow. Roguish,quick-witted, and incredibly lucky, Jack Sparrow is a pirate who sometimes ends up being a hero, against his better judgement. Captain Jack looks out for #1, but he can be counted on (usually) to do the right thing. He has an incredibly persuasive tongue, a mind that borders on genius or insanity, and an incredible talent for getting into trouble and getting out of it. Maybe its brains, maybe its genius, or maybe its just plain luck. Or maybe a mixture of all three.

Captain Jack Sparrow

75%

James Bond, Agent 007

67%

The Terminator

58%

Indiana Jones

54%

Maximus

54%

Lara Croft

50%

William Wallace

46%

Neo, the "One"

42%

El Zorro

33%

The Amazing Spider-Man

29%

Batman, the Dark Knight

17%

Which Action Hero Would You Be? v. 2.0
created with QuizFarm.com

Brúðarkjólaleiga Dóru

2006-02-22T12:36:00.000-08:00

Gekk inn í leiguna og við mér blasti bleikur brúðarkjóll. Á ofhlaðinni slá voru síðan svaðalegir kjólar, velflestir skósíðir með pallíettum, til leigu. Samkvæmiskjólar. Úlala. Fór með tvo til málamynda inn í mátunarklefa, dró hvítt tjald fyrir og hóf mátun. Afgreiðslukona, sem reykt hafði ófáa pakka um ævina, bauð í sífellu fram hjálp sína. Vildi ólm koma inn í fyrir tjaldið og renna upp. Eitthvað var ég treg til, enda ekki týpan til að vilja blanda bláókunnugum gul-fingrum, sem hvít..., á síður mínar. Leist ekki á spegilmyndina og hafnaði báðum kostum. Gekk út með bíllykilinn í hendinn og engan kjól. Verð líklega bara í denim.

mánudagur

2006-02-20T09:31:00.000-08:00

Já, eftir helgi kemur víst mánudagur. Hlýr mánudagur í dag. Gott mál. Ótrúlegt en satt þá er febrúar brátt á enda. Rétt rúmlega vika og búmm...mars. Þá verður nú skólinn svo gott sem búinn. Bara rúmlega mánuður eftir. Skólasókn lýkur 7. apríl og því ljóst að kerla verður að herða sig í lestri. Ætlaði að taka pakkann með trompi í byrjun annar, en síðan hefur eitthvað losnað um slík áætlanahöft. Verkefni framundan sem ég þarf að klára fyrir 7. apríl eru:

45% paraverkefni - Mat á árangri
45% einstaklingsritgerð - Mat á árangri
30% hópverkefni - Stefnumiðuð stjórnun
25% hópverkefni - Stjórnun þjálfunar og starfsþróunar
15% hópverkefni - Vinnusálfræði
35% paraverkefni - Vinnusálfræði

Já, semsagt...Elsa; hættu að blogga!

Árshátíð KB banka framundan

2006-02-15T11:32:00.000-08:00

Ja man. Verð víst að fara að fara í háralitun, panta ljósatíma, leggja af, skipta um nef, kaupa mér sokkabuxur og síðast en ekki síst...LEIGJA KJÓL.

Sigurjón kom heim í dag með þær fregnir að búið væri að auglýsa í bankanum ákveðnar kjólaleigur sem bankinn hefur fengið tilboð hjá. Snilld. Þar með er búið að koma því inn hjá öllum gellum og gæjum, raunverulegum sem vonabís, að útlitið skipti öllu.

Ætli bankinn verði með afslátt á förðun, fitusogi og hárlögn?!

persónuleikapróf

2006-02-15T06:13:00.000-08:00

Gerði persónuleikapróf á netinu mér til yndisauka. Niðurstöðurnar eru eftirfarandi:

Career Inventory Test Results

Extroversion	\|\|\|\|\|\|\|\|\|\|\|\|\|\|\|\|\|\|\|\|\|\|\|\|	76%
Emotional Stability	\|\|\|\|\|\|\|\|\|\|\|\|\|\|\|\|\|\|\|\|\|\|\|\|	73%
Orderliness	\|\|\|\|\|\|\|\|\|\|\|\|\|\|\|\|\|\|\|\|\|	63%
Altruism	\|\|\|\|\|\|\|\|\|\|\|\|\|\|\|\|\|\|	60%
Inquisitiveness	\|\|\|\|\|\|	20%

You are a Supporter, possible professions include - nurse, social worker, caterer, flight attendant, bookkeeper, medical/dental assistant, exercise physiologist, elementary school teacher, minister/priest/rabbi, retail owner, officer manager, telemarketer, counselor, special education teacher, merchandise planner, credit counselor, athletic coach, insurance agent, sales representative, massage therapist, medical secretary, child care provider, bilingual education teacher, professional volunteer.

Take Free Career Test
personality tests by similarminds.com

Fluga á vegg - móðir í forstofu

2006-01-19T09:07:00.000-08:00

Sótti börnin tvö í vistun rétt fyrir fjögur í dag. Hefðbundið. Varð vitni að eftirfarandi í forstofu leikskólans:

Drengur, líklega fjögurra til fimm ára gamall, var einn frammi í forstofu að dandalast. Prófaði að fara inn í þurrkskápinn og eitt og annað. Ég leiddi hugann að því hvað hann væri að gera frammi eftirlitslaus. Allnokkru seinna, líklega um 2 mínútum eða svo, kom ung kona askvaðandi innan af miðju leikskólans. Líklega móðir drengsins. Samtal þeirra var á þessa leið:

Móðir: Hvað, -ert'ekki kominn í fötinn drengur?
Drengurinn var þá liggjandi undir setubekk.
Móðir: Ertu liggjandi í gólfinu? Viltu gjöra svo vel og standa upp. Hvað á þetta að þýða?
Drengur: ...(sagði held ég ekki mikið)
Móðir: Viltu drífa þig. Amma þín bíður úti í bíl. Hvar er Henson gallinn þinn?
Drengur: Hjá pabba.
Móðir: Hjá pabba þínum! Hvurslags er þetta eiginlega. Hélt áfram rausi og ég var orðin miður mín.

Síðan fer ég út með mína unga. Drengurinn kemur síðan hlaupandi út í stígvélum einum auka"klæða" og hleypur í rólu og fer að róla. Móðirin kemur askvaðandi.

Móðir: Þú átt að hlýða mér! Ég sagði þér að fara ekki út nema með húfu. Heyrirðu ekki hálfa heyrn? Hvernig er þetta með þig?

Með það fóru þau upp í bíl og þar með heyrðust ekki fleiri orð úr munni þessarar móður. Vá. Mér er sama þó hún slysist inn á þessa síðu og sjái þessi skrif. Hún ætti bara að hugsa sinn gang. Þessi drengur átti samúð mína alla. Ég hugsaði með mér að líklega væri lausn fyrir hann að mæta í leikskólann á morgnana. Laus undan niðrandi svívirðingum og stanlausu pexi frá móður sinni. Skamm bara!

Niðurtalning

2005-12-23T13:09:00.000-08:00

Fórum í þrjú hús í dag. Fyrsta húsið var í eigu bróður míns og konu hans. Fengum þar kaffi og smákökur að hætti Jóa Fel. Bragðgott, ekki vantaði það. Síðan rúlluðum við fjölskyldan til langömmu barnanna, ömmu Sigurjóns. Þar var sonurinn sýndur hratt sökum þreytu og ekki smásmuga til afslöppunar. Annað foreldrið á vaktinni, stanslaust. Vafalítið allir fegnir þegar þeirri heimsókn lauk, þó alltaf sé gaman að sækja Ólöfu heim, bakkelsi útúr dyrum og endalaus kaffiáfylling. Þaðan var haldið beina leið upp í Staðarhverfi í skötuveislu til Þorfinns og Söru. Með smá stoppi í Skeifunni til afhendingar pakka. Hræðileg umferð um Hagkaupsplanið og það eitt var meira en nóg fyrir mig. Úff. Mikið var ég fegin að hafa ekki átt leið í búð í dag. Ekki fyrir nokkurn mann að finna stæði, síðan engar körfur, allir fyrir öllum o.s.frv. Þá er nú betra að vera heima og raða skóm í skóhillur í forstofu.

Sigurjón borðaði kæsta - kæstari - kæstasta skötu. Vonandi verður hægt að kyssa hann uppúr sex á morgun.

Búin

2005-12-22T14:54:00.000-08:00

Í prófum. Er það vel. Ótrúlega gott bara. Slúttuðum með samsæti á Sögu að loknu síðasta prófinu á mánudaginn var. Þeir "hörðustu" í bransanum fóru síðan niður á Vegamót að borða. Ferlega góður matur! Fékk mér Tagliano (eða eitthvað álíka nafn) með hvítlauksristuðum humarhölum. Jeremías. Það var eins gott og það hljómar. Skemmtilegt samsæti með samnemendum, sem voru allir sammála því að gera betur í grúppuformun, þ.e. að kynnast betur og reyna að mynda einhverja stemmningu innan hópsins, en til þessa hefur hún ekki verið mikil.

Af jólahaldi þetta árið er allt sæmilegt að frétta. Ætlaði að gera ís í kvöld en verð að fresta því til morguns. Er ákveðin í því að jólin komi bara þegar klukkan slær sex á laugardag, hvort sem ég verð búin að þrífa eður ei. Gera ís eður ei. Geymslunni verður ekki breytt. Frekar en fyrri daginn. Jólin hljóta líka að koma í geymslur, sem eru fullar af drasli.

Heimilisskipti

2005-12-08T05:28:00.000-08:00

Af því að ég nenni alls ekki að læra fyrir prófið á morgun, þá er best að tékka á póstinum mínum...hugsaði ég í morgun. Gerði það og sjá! Fleiri tilboð um heimilisskipti kominn inn í inboxið mitt. Snilldin ein.

Við fórum nefnilega í sumarfrí síðasta sumar til Danmerkur, í gegnum heimilisskiptasíðu sem við erum meðlimir að. Fengum frábært einbýlishús á Jótlandi í skiptum fyrir okkar 3ja herbergja íbúð hér í Reykjavík. Dásamlegur garður, risatstórt trampólín og sæla ein, - fyrir utan rigningu megnið af ferðinni. Fjölskyldan sem skipti við okkur mætti okkur brún og sælleg eftir Íslandsferðina á Kastrup að tæpum tveimur vikum liðnum. En í alla staði frábærlega vel heppnað dæmi.

Það sem mér finnst svo skemmtilegt við þetta er að maður getur fengið tilboð um "swap" hvaðanæva úr heiminum. T.d. í morgun var það fjölskylda frá Tel Aviv, Ísrael, sem óskaði eftir skiptum. Við vorum sammála um það, hjónaleysin, að þangað ætlum við ekki á næstunni, þannig að ég afþakkaði annars gott boð nú rétt í þessu. Síðan fengum við beiðni um skipti um páskana frá fólki í Bath á Englandi. Ákváðum að afþakka það. Verð líklega í einhverjum skólagír þá.

En rúsínan í pylsuendandum...fengum snilldartilboð nú í morgun um skipti á einbýlishúsi við Florence (45 kílómetrar frá) með einkasundlaug, heitum potti, slatta af herbergjum og öðru eins af baðherbergjum. Allt fyrir okkar 82 fermetra. Er því sýnd hratt í dag yfir þessu og hreinlega verð að selja Sigurjóni hugmyndina. Sigrún systir er jafnæst yfir þessu og ætlar AÐ SJÁLFSÖGÐU með, ef af verður. Enda erum við síams.

Jæja, best að lesa um Evrópusambandið. Það tengist jú Ítalíu...

Prófatíð

2005-12-07T09:05:00.000-08:00

Mikil dásemd að ljúka tímasókn nú síðasta miðvikudag. Fyrirlestrar algjörlega orðnir fyrir mér í áætlanagerð varðandi lestur fyrir próf. Ekki svossum sérstök tilhlökkun fólgin í því að fara í próf, en rétt eins og ófrísk kona á síðasta meðgöngumánuði...þá vil ég bara losna. Sama hversu hörmuleg lífsreynsla það verður. Bara klára.

Fyrsta próf hófst á laugardaginn var. Heimapróf í Stjórnun og forystu. Fengum prófið klukkan níu um morguninn og skiluðum á mánudaginn var, í síðasta lagi kl. 15:00. Ekki góð hugmynd að próffyrirkomulagi. Stanslaus vinna. Enginn lúxus þar á ferð. Gekk ágætlega, vona ég.

Nú er ég að lesa fyrir próf á föstudaginn í Samskiptum á vinnumarkaði. Algjörlega ekki í stuði fyrir það, en öllum sama líklegast. Fæ engin samúðarskeyti í póstkassann í það minnsta!

Mesti horrorinn verður þó í næstu viku. Próf í Þáttum í aðferðafræði og síðan í Inngangi að rekstri og stjórnun. Páfagaukslærdómur fyrir bæði fögin. Ég sem hélt að slík próf væru ekki í meistaranámi, - en greinilega er framhaldsskólastemmningin enn að gera sig.

Mánudagurinn 19. desember verður síðasti dagurinn í prófatíð, en þá tek ég próf í Mannauðsstjórnun. Helgin fyrir það próf verður vafalítið andlega erfið. Að halda sig við lestur og nánast komin jól. Ekki gaman. Ótrúlegt að við séum þó ekki í prófi á síðasta prófdegi við HÍ. Nei, hann er 21. desember. Aumingja þeir sem þurfa að sitja undir slíkum ósköpum.
______________

Það má enginn...ég endurtek ENGINN, segja mér hvað er gaman í jólastússi niðr'í bæ. Það má enginn segja mér hvað hann er búinn að baka mikið. Né kaupa allar jólagjafirnar. Hvað þá að laga til og skrifa jólakortin.

Betra er blogg að skrifa...

2005-11-21T13:42:00.000-08:00

...en ritling, eins og máltækið segir. Einungis tvö verkefni eftir þessa önnina og þá, kviss búmm, próf. Frumlestur fyrir öll próf, rétt eins og í menntaskóla. Fussum svei. Gekk á vegg varðandi námsefnið fyrir rúmri viku. Nenni hreinlega ekki meiru. Er búin að sitja við tölvuskjáinn í kvöld til að krafsa úr innviðum heilans eitthvað vitrænt um "liðsvinnu" í ritlinginn sem skila á næsta föstudag. Frábært. Hvar gengur hún og hvar ekki. Af hverju? Mjög áhugavert efni, en kerla samt tóm. Náði þó að hamra inn ellefu hundruð orð. Hvaðan þau komu veit enginn. Skal ljúk'onum á morgun. Skal. Ætlaði að vera búin með hann 17. nóvember. Frestunarárátta er fallegt orð!

Að byggja eða breyta

2005-11-17T12:15:00.000-08:00

Já, íbúðin fulllítil fyrir fjögurra manna fjölskyldu. 89 fermetrar með geymslu, flott stærð og frábær staðsetning en við Sigurjón sýnd hratt og fjölskyldan orðin fjórir.

Í stað þess að byggja við, enda sá möguleiki ekki inni í myndinni, þá var brugðið á það ráð að hugsa rýmið upp á nýtt. Svossum ekkert ný hugmynd, hvorki á þessu heimili né öðrum. Svissuðum við því herbergjum eða öllu heldur fluttum Bríetina yfir í okkar herbergi og fylltum í stað barnaherbergið af amerísku rúmi. Þengill fær síðan helmings afnot af "verelsi" ásamt systur þegar hann verður tveggja ára og flytur þá rúmið sitt yfir í meyjarsvítu. Mun hentugra fyrir margra hluta sakir. Hjónaherbergið á kyrrlátasta staðnum, en barnaherbergið ofan í stofunni. Því má ætla að svefn heimsljósa verði mun betri í kjölfarið og sætaferðum ljúki máske yfir í risarúm.

Tja, hvur veit!

Að hafa eða ekki hafa samviskubit

2005-11-16T11:32:00.000-08:00

Einn daginn þegar ég sótti Bríeti í leikskólann fór starfsmaður leikskólans með mér fram í forstofu til að sýna mér, við lítinn fögnuð starfsmanns og brátt enn minni fögnuð minn, að foreldrar stúlku á leikskólanum höfðu tekið vettlinga Bríetar heim í misgripum og merkt þá stórum stöfum með túss yfir alla vettlingana. Ekki með nafni Bríetar þó! Skömminni skárra hefði það nú verið. Nei. Upphafsstafirnir voru af öðrum toga en okkar heimilis. Merking sem hefði sómt sér vel á frystihússtígvélum, en tæplega lúffum smáfrúar. Hvað með það, aumingja starfsmaðurinn hóstaði þessu upp og baðst afsökunar á verknaði viðkomandi foreldra og sagðist mjög leið yfir þessu. Ekki hvarflaði að mér að skjóta sendiboðann, enda tiltölulega friðelskandi manneskja.

Fór heim. Þoldi ekki ný-merkingu og gat ekki hjá því komist að finnast þessi framkoma foreldrana önnur en ég hefði sjálf haft í frammi. Ég hefði farið og keypt nýja vettlinga með það sama, í stað þess að skila bara spjölluðum vettlingum Bríetarbarns til leikskólastarfsmanna og láta þá um skítverkin. Merkilegt.

Nema hvað. Á foreldrafundi viku síðar ákvað ég að láta ekki bjóða mér að sitja uppi með þetta mál, enda hafði það grafið sig inn í sálartetur mitt. Rétt eins og þegar maður lendir í því að á mann er keyrt. Alltaf tjón fyrir mann. Blásaklausan. Deildarstjórinn fékk ljúfmennis, en þó ákveðnisræðu, frá mér hvar ég sagðist ekki vera dús við þetta mál. Þrátt fyrir ákaflega penar merkingar af minni hálfu á lúffunum rauðu þá taldi ég þetta tæplega vera eitthvað sem ég ætti bara að kyngja si svona. Deildarstjórinn var sammála og harmaði málið í heild. Ekki við leikskólann að sakast, enda var það aldrei atriðið. Nema hvað, -stjórinn sagðist ætla að taka málið í sínar hendur.

Í dag þegar ég mætti í leikskólann að sækja Bríetina þá rétti "sendiboðinn" mér nýjar lúffur. Hárauðar sem hinar, þó af öðrum toga, og sagði að leikskólakonur hefðu óskað eftir því við foreldra frystishússmerkinga að þetta yrði lausn mála. Með rauðelsi í höndum mælti kerla við starfsmann; "ég neita að vera með samviskubit yfir þessu!"

Og þar við situr. Rétt skal vera rétt.

Vafalítið eru foreldrar í Rimahverfinu sem hata herfumóður, en látum svo vera. Réttlætið náði fram að ganga. En líklega reyni ég að merkja lúffur á augljósari máta í framtíðinnni, -svo mikið lærði kerla!

Snúa í gang!

2005-10-31T13:48:00.000-08:00

Svona eins og pabbi gerði við villís-jeppann forðum. Með sveif. Nenni engu eftir helgina. Þá á ég hér við námslega séð. Æi.

Ætlaði mér stóra hluti í dag. Eitthvað urðu þeir smáir. Agnarsmáir. Ákvað að fara í heimsókn til Söru með ljósin mín tvö og naut þar setu við eldhúsborðið í góðum félagsskap. Ekki að ræða það að fara heim og læra. Over my...

Verð nú líklegast að blása lífi í lesturinn á morgun. Er það ekki málið? Á morgun segir sá...ja, hreinlega bara lati. Finnst ég stundum bara búin með þennan skólapakka, en er jafnframt alveg mjög ánægð með að hafa drifið mig. Bara átak í sjálfu sér.

Hvað um það.

Fórum öll fjögur í IKEA á sunnudaginn. Uppgötvaði þar, mér til alsælu, að ég er orðin IKEA södd. Reyndar hef ég ákaflega takmarkaðan áhuga á kaupum af öllum toga. Er mettuð af dóti og allskyns glingri/húsgögnum/gardínum. Dásamleg tilfinning. Hélt ég ætti þetta ekki til. Sá fyrir mér að verða ævina út að bera heim flatpakkningar frá þeim sænsku. En nú er bara öldin eitthvað að breytast. Önnur. Kem líklega ekki einum bolla til viðbótar inn í Rimann smáa.

Eru þetta ellimerki?

Slaki

2005-10-27T05:19:00.000-07:00

Þar kom að því. Slaki í náminu. Nú hefur maður tíma til að vera ekki með samviskubit í allar áttir, sama hvað maður gerir: "Ætti að vera læra!" "Ætti að vera heima með mínum!" "Ætti að gefa mér tíma fyrir vinina!"

Anyway, slaki og það er fínt.

Fer í Kauphöllina á morgun í "vísindaferð" með Maestro, sem er félag meistaranema í Viðskipta- og hagfræðideild við Háskóla Íslands. Kitta mun halda þar stutt erindi ásamt tveimur öðrum og síðan verður, vona ég, eitthvað í fljótandi formi! það verður gaman að sjá nýja vinnustaðinn hennar Kittu og átta sig þannig betur á hennar lífi sem PR gellan. Ég þekki jú aðrar hliðar kerlu mun betur, s.s. eins og troðandi fyllingu í risa-kalkún á röndóttum náttbuxum, eða syngjandi "bí-bí-bí-bí!" Ætli ég verði ekki að kalla hana A.Kristínu á morgun?

Síðan er það matarboð á laugardagskvöld. Eitthvað í gangi allar helgar. Þannig á það líka að vera. Við Sigurjón höldum boðið og sjáum um aðalréttinn. Sigurjón Atli og Jóney, Sigga og Valdi og Dísa og Jóngeir mæta í uppsveitir (Grafarvoginn) og skipta forrétti, eftirrétti og víni á milli sín. Sniðugt fyrirkomulag. Einn galli þó á gjöf Njarðar. Við eigum ekki stell fyrir átta. Því er ljóst að ég þarf í Te og kaffi til að kaupa í Denby-stellið, sem nota bene er hætt að framleiða. Loforðið sem ég fékk árið 2000 þegar ég keypti stellið upphaflega, um að það yrði á markaðinum næstu 50 árin eða svo, var greinilega innantómt. Frábært! Þetta þýðir bara eitt:

Við þurfum að gifta okkur, Sigurjón!

Sé í toppinn

2005-10-19T05:46:00.000-07:00

...á blessuðu fjallinu sem blasir við mér og hefur gert undanfarnar vikur. Næsta vika er massív hvað skil á verkefnum af ýmsum toga varðar. Svona til að gefa innsýn í líf mitt þá lítur áætlunin svona út af hálfu Viðskipta- og hagfræðideildar HÍ:

25. október: skil á hálftilraun og spurningalista í Þáttum í aðferðafræði - 15%
26. október: próf í Inngangi að rekstri og stjórnun - 30%
28. október: skil á ritlingi (lítil ritgerð, sambærilegt við jeppa og jeppling!) í Samskiptum á vinnumarkaði - 10%
31. október: Skil á ritgerð í Mannauðsstjórnun - 30%

Er hálfnuð með aðferðafræðina, nánast í flúkti í lesefni við það sem kennarinn hefur núþegar farið yfir í Inngangi að rekstri og stjórnun, ekkert byrjuð á ritlingnum en jafnframt búin með ritgerðina í mannauðsstjórnun. Ákvað að setja punktinn niður einhversstaðar í gær og hætta þessu. Maður getur jú haldið endalaust áfram í ritgerðavinnu. Frekar spurning um að hætta, -stramma sig af.

En næsta mál hjá mér er þá að ná að haka út innviði ofangreinds lista. Efni ritlingsins í Samskiptum á vinnumarkaði er: Gefum okkur tvær atvinnugreinar A og B þar sem rekstur A er mun áhættusamari -- ytri áföll algengari -- en rekstur B. Segið frá því hvernig þið mynduð sníða hvatalaunakerfi að greinunum tveimur, þ.e.a.s. hvernig yrði hvatalaunakerfi A að mati ykkar frábrugðið hvatalaunakerfi B?

Komdu endilega með hugmyndir. Já og Hildur, gott að fá söguna frá þér um sálfræðilega samninginn. Ótrúlegt hvað fólk getur feilað stórt í samskiptum við aðra. Stefnan hjá mér er að læra af eigin mistökum og annarra, til að losna við að þurfa bæta á minn lista yfir mistök sem vafalítið er til staðar, -þó maður telji sig vera í ágætis málum. Svona listalega séð!

Jæja, farin.

Í herbúðum

2005-10-09T14:29:00.000-07:00

Ef einhver dirfist að tjá sig um ágæta sjónvarpsdagskrá sem stöðvar hafa fram að færa á kvöldin, þá mun sá hinn sami fá fræga gínuhendi í fésið frá mér. Talk to the hand bara. Veit ekki lengur neitt og neitt í þjóðmálum, horfi ekki á fréttir, sé enga þætti, sit bara við tölvuskjá og pikka inn ritgerðir, ritlinga og brátt hálftilraun. Í aðferðafræði. Fikk, eins og Kitta myndi segja það (eitthvað skoskt dæmi í stað fokk því það er svo dónalegt).

Reyni þó, enn sem komið er, að halda mig við frítíma á milli kl.16 og 20 á virkum dögum, því þá er gæðatími með kindum tveim. Bríetin og Þengill verða ekki sett undir mottu svo auðveldlega. Neibb. Frekar sit ég við á kvöldin og lem á lyklaborðið. Í raun ótrúlegt hvað maður hefur vannýtt kvöldin til ýmissa verka undanfarið. Alltaf komin upp í sófa eftir átta og föst fyrir framan sjónvarpið í stað þess að gera eitthvað. Eins og t.d. að mála gluggana hvíta. Sigurjón! Þetta er ekki skot á þig:)

Jæja, komin með grind að ritgerðinni minni í mannauðsstjórnun sem fjallar um sálfræðilega samninginn. Mjög áhugavert efni og af nægu að taka þar. Allir þekkja sögur, annað hvort af sjálfum sér eða öðrum, þar sem ótrúleg klúður af hálfu vinnuveitenda haf kostað svekkelsi og kannski síðar uppsögn af hálfu starfsmanns. Mannlegi þátturinn er stór-stærri-stærstur.

Sendu mér, lesandi góður, endilega dæmi um slíka sögu með því að ýta á comment hér fyrir neðan. Mistök eru til að læra af þeim, er ekki svo?!

Afmæli

2005-10-02T07:01:00.000-07:00

Kerla á afmæli í dag. Í tilefni dagsins hringdi pabbi og söng. Hann sagðist jafnframt ætla að senda blóm seinna í dag. Ég lagði til að hann sleppti þeirri peningaeyðslu og biði mér frekar í cappuchino kaffibolla á kaffihúsi næst þegar við hittumst. Skömmu síðar hringd'ann aftur og var þá Gunnur búin að semja leiru í tilefni dagsins og óskarinnar um kaffið. Var leiran send í tölvupósti suður yfir heiðar og er sendingin eftirfarandi (enn einn tölvupósturinn sem birtist fyrir augu almennings!!!):

Sigurlaug Elsa
2. október 2005

Til hamingju með daginn!

Mannauð sinn hún meta kann,
manni og börnum stýrir.
Á pabba setur blómabann,
betur það útskýrir:
„Kaffibolla kann að meta,
kaupa hann þú ættir geta.”

Pabbi sinn og Gunnur
_________

Takk, takk. Sigurjón gerði reynar athugasemd við orðið "stýrir!" ;)

Farvegur

2005-09-22T13:59:00.000-07:00

Já, líklega má segja að nýja lífið sé að ná einhverju jafnvægi. Finnst þó Þengillinn minn eitthvað minni en lítill þegar hann er sóttur og kemur heim eftir pössun allan daginn. Skinnalingur ekki orðinn eins árs. En hann er samt hetja. Þegar réttur í fang dagmóður á morgnana þá lætur hann sig einhvern veginn hafa það. Er ekkert "thrilled" en harkar af sér og vinkar mömmu. Hildur dagmóðir er ákaflega hlý við hann og það hjálpar í kreppunni sem mæður finna vafalítið allar fyrir á þessu afhendingar-augnabliki.

Að sitja heima við borðstofuborðið og læra á meðan aðrir fjölskyldumeðlimir eru að heiman er að komast í vana.

Er búin að koma á fót leshópi í einu faginu í skólanum, -mannauðsstjórnun. Bókin sem notast er við er ólesanleg og því varð að bregða á eitthvað ráð. Kræst. Ég fer nú ekki að taka upp á því að falla á meistarastigi. Nei. Ekki má. Þar af leiðandi þarf kerla að harka af sér, líklega eitt kvöld í viku, og halda út í myrkrið á vit skólafélaga til að ræða starfsmannahald, starfsmannastefnu, þróun, kennismiði...og hvað þetta heitir allt saman. Amm, það verður vonandi bara gaman. Svona þegar maður verður kominn á staðinn, í það minnsta.

Jæja, ætla að klára ritlinginn minn í Samskiptum á vinnumarkaði. Nenni ekki að hafa þetta hangandi yfir mér. Á reyndar ekki að skila honum fyrr en í október. En, það verður nóg annað þá! Gamla seig er bara í skynsemiskasti.

Over and out.

Bókhlaðan

2005-09-14T14:48:00.000-07:00

Fór þangað í fyrradag. Fann gamlar dagblaðsgreinar frá 1977 um verkfall opinberra starfsmanna, skrollaði í forláta filmuvél sem maður sér bara í bíómyndum og las gamla Mogga. Snilldar-apparat. Hvar ég sat þarna í lokuðu herbergi sem kvikmyndastjarna birtist þá ekki Anna gamla frá Syðra-Hvarfi á skjánum. Myndir frá réttum heima, síðan þetta fyrir 28 árum! Reyndi að prenta hana út fyrir Kittu, enda um ömmu hennar að ræða, en án árangurs. Ekkert nema svartnættið. Jæja. Það verður að hafa það. Sótti síðan Stjórnartíðindi í "lögfræði"-hillurnar og fletti upp lögum frá '77. Heimildasöfnun fyrir ritling (ritgerð sem ekki nær fullri stærð). Efnið: Opinberir starfsmenn eiga ekki að hafa verkfallsrétt. Hvað finnst þér?

Á fullu gasi

2005-09-08T13:37:00.000-07:00

...já og þyrfti auka "power" til dagsverka. Allt breytt. Skólinn hafinn. Ekki einu sinni tími til að blogga. Neibb. Þrátt fyrir nýja huggulega sófann sem mættur er inn á stofugólf þá skal á hörðum borðstofustól setið. Eftir skóla. Við Hannes Hafstein (borðstofuborðið). Að lesa. Fram að barnasækelsi. Og síðan eftir átta þegar smáfólk er lagst til hvílu. Á að lesa 232 blaðsíður fyrir þriðjudaginn í einu faginu. Auðvitað á fag-ensku. Olræt. En síðan eru það greinarnar 18 sem Gylfi henti inn á Ugluna (nemendavefinn) í dag auk kafla í aðferðafræði. Að ógleymdri tveggja blaðsíðna samantekt á stjórnunartengdu efni svo og framsögu varðandi efnið. Já. Á föstudaginn, takk fyrir. Ætli ég geti fengið hluta afnotagjaldanna felldan niður í vetur?! Mun ekki horfa á sjónvarp.

En gaman er það.

Netleysi

2005-08-31T13:11:00.000-07:00

"Sigurjón! Mér líður eins og ég hafi krafsað mig undanfarna daga um sanda Sahara án vatnssopa." Eitthvað á þessa leið var setning mín til sambýlingsins, unnusta og tölvunarfræðingsins í dag þegar netið var LOKSINS tengt á ný á heimilinu. Ég fékk að drekka. Þannig séð. Ah.

Einn af kostunum við að komast á netið á ný er sá að nú get ég séð hvort komnar eru frekari upplýsingar um blessað námið mitt á nemendasvæði HÍ. Jú, mikið rétt. Gylfi búinn að setja langþráð skipulag námskeiða hans inn á Ugluna (nemendavefurinn). Gott hjá karli. Búin að bíða eftir þessu í einhverjar vikur. Takk.

Fór annars á fund með meistaranemum við Viðskipta- og hagfræðideild Háskóla Íslands (Vaðlaheiðarvegavinnuverkfæra...) á mánudaginn var. Fullur salur af fólki. Húmor í kennurum, kaffi, sódavatn, kleinur og kex í kaffihléi og allt orðið mun smartara en ég minnist frá fyrra námi í HÍ. Innritunargjöldin mín fóru í kexið. Eða límmiðana sem voru utan um vatnsflöskur. Háskólavatn, fullt af visku auk sóda. Leist vel á mig. Ætla að reyna að taka þátt í háskólasamfélaginu í vetur, eins og við vorum ítrekuð hvött til að gera á þessum fundi. Nú þegar er búið að boða oss á Megastónleika um næstu helgi. Veit nú ekki með það, en eitt er þó víst. Skólinn hefst á morgun!

Myllusteinar

2005-08-25T08:25:00.000-07:00

Þungu fargi af mér létt. Skólasnótinni. Borgarráð rétt í þessu að ákveða að falla frá hækkunum á daggæslugjöldum/leikskólagjöldum fyrir foreldra þar sem annað er í námi. Já, skál fyrir því. Sparast nokkrar krónur í mánuði enda veitir ekki af. Nóg húrrast maður niður í "tekjum" við skólainnritun. En allt til betri vegar.

Reyndar höfum við það óheyrilega gott, skv. almannaróm, eftir að Sigurjón hóf störf í bankanum. Vegna launaleyndar sem þar ríkir þá halda velflestir að hann sé með slík launin! Gott og vel. Hef ég það eftir einum starfsmanni bankans, nota bene ekki Sigurjóni, að þessi mikla leynd yfir launum þar orsakist af skítalaunum en ekki öfugt. Sel það ekki dýrara.

Hrollur

2005-08-24T07:48:00.000-07:00

Úff! Ekki laust við að um mann fari.

Var að setja inn skil á verkefnum og prófum á dagatal á nemendasíðunni minni við HÍ. Kennsluáætlanir komnar fyrir tvö fög en þrjú enn ókomin á netið. Finnst nóg um skilafjöld í fögunum tveimur. Hver einasta vika nánast fram að 1. des.

Jæja kerla mín! Nú þýðir ekkert að fokka á netinu lengur.

Svifaseinelsi

2005-08-24T01:29:00.000-07:00

Ljótt nýyrði, -svona í morgunsárið. Kerlu finnst nefnilega kennarar námsins sem framundan er ekki vera sérlega snöggir til að birta kennsluáætlanir og annað góss til yfirlits. Vita þessir aðilar ekki að hér er námsþyrstur einstaklingur í gíslingu heimafyrir með kalamín áburð á lofti? Í slíkum aðstæðum þarf að hafa eitthvað áhugavert fyrir augum annað en sífjölgandi hlaupandi bólur á sonarbúk.

Líður að tíðum...

2005-08-20T16:22:00.000-07:00

Rigningin segir meira en mörg orð. Haustið að hellast yfir.

Fyrir ári síðan var nýr kafli að hefjast í lífi okkar í fjölskyldunni. Nýr meðlimur að fara að fæðast. Í dag, þessu ári síðar, er nýmeðlimurinn á leið út í lífið með gamlan leðurbakpoka móður sinnar. Á leið til dagmóður þar sem móðirin sjálf skal í skóla. Enn eina ferðina! Einhver hefði haldið að komið væri nóg. "Bara vel!" -eins og Bríet myndi segja það. En nei, það er víst nauðsynlegt að dæla á sig gráðunum til að haldast inni í samkeppni um djobbin fínu. En aðalástæða þessa heimilis er þó löngun til námsins, enda hlýtur það að vera besta ástæðan. Það eru forréttindi að geta farið í skóla og lært. Ótrúlega gaman líka. Svona oftast. Nema þegar rífa þar tvo úfna hausa uppúr ylvolgum rúmum í vetur, rusla þeim í fötin og út í bíl. Á fastandi maga. Skafa rúður, dúðelsi í barnastólum...hálfsofandi. Æi, hvað er þetta?!? Allt vill lagið hafa.

Er líklega búin að vera "of" lengi heimavinnandi. Eitthvað heimóttaleg orðin! Er alsæl að dúllast í gegnum daginn með dagskrárleysu mér við hlið. En kemur maður ekki meiru í verk undir pressu?